పల్లవి : సాంప్రదాయ సమ్మోహనం,ఘన పౌరుషమ్మునకు ప్రాంగణం సారస్వత సమ్మేళనం, వెలలేని సంస్కృతికి నిలయం అచ్చమయిన నుడికారము,అతి సరళీకృత సంభాషణం భావగర్భ భాషామృతం,సరిలేని సహజ సౌందర్యం. స్వచ్ఛమైన మాండలీకమో, సంస్కృతాంధ్ర సాన్నిహిత్యమో ఇతర భాషలందు మిన్నగా తెలుగు నిలిచెరా., పద్యకవుల ఇంద్రజాలమో,భాషలోని తియ్యందనమో దేశభాషలందు లెస్సగా తెలుగు నిలిచెరా., ఏ పూర్వజన్మ పుణ్యమో..తెలుగువాడినైతిరా...(సాంప్రదాయ) చరణం 1 : ఆదికవుల ఆదిరచనమో, శైవ కవుల సింహనాదమో, అన్నమయ్య సంకీర్తనమో.. తెలుగు వెలిగెరా., దిగ్గజాల ధీర జనితమై, కృష్ణదేవరాయ సహితమై, రామదాసు భక్తి భావమై.. తెలుగు వెలిగెరా., శ్రీనాథు చేతివాటాన, పోతన్న కైత మాటున్న, వేమన్న పద్య పాఠాన ఉన్నది తెలుగురా.., శ్రీకాకుళాంధ్ర శ్రీకారం, త్రైలింగ ధామ సందోహం, గురజాడ వారి చెణుకుల్లో నిలిచే తెలుగు చరితరా...(సాంప్రదాయ) చరణం 2 : గిడుగు వారి కార్యదీక్షయై, అమరజీవి త్యాగ నిరతియై, టంగుటూరి వీరతేజమై..తెలుగు నవ్వెరా., విశ్వనాథ వాణిముత్యమై, కందుకూరి కంటిపాపయై, శ్రీశ్రీ గారి సింహ గర్జనై తెలుగు వెలిగెరా., ఉయ్యాలవాడ ఉక్రోశం, అల్లూరి వారి ఆక్రోశం, భీమన్న గోండ్రు గాండ్రింపై నిలిచే తెలుగురా.., ఇమ్మహాత్ములను మది తలచి,పాశ్చాత్య భాషనే మరచి, మన మనసులోన నిలపాలి నిత్యం తెలుగు ఉనికిరా..(సాంప్రదాయ)